Latest News

தங்களின் பிராந்திய செய்திகளை அனுப்பி வையுங்கள் உலகறிய செய்கிறோம்
newsalai.com@gmail.com

நீலம் புயல் கரையை கடந்தது

சென்னை மாமல்லபுரம் அருகே நீலம் புயல் கரையை கடந்தது. தமிழகத்தின் உள்மாவட்டங்களான வேலூர், திருவண்ணாமலை, கிருஷ்ணகிரி வழியே பயணித்து வரும் புயல் வலுவிழக்கும் என வானிலை ஆய்வு மையம் தெரிவித்துள்ளது. எதிர்பார்த்ததை விட முன்னதாகவே புயல் கரையை கடந்ததாக வானிலை மையம் தெரிவித்துள்ளது.

சென்னையில் அடையாறிலிருந்து மாமல்லபுரம் வரை மின்சாரம் நிறுத்தி வைக்கப்பட்டுள்ளது. முன்னெச்சரிக்கை நடவடிக்கையாக மின்சாரம் நிறுத்தப்பட்டுள்ளதாக மின்சார வாரியம் தெரிவித்துள்ளது. புயல் முழுமையாக கரையைக் கடந்த பின் மின் விநியோகம் மீண்டும் தொடங்கும் என அறிவிக்கப்பட்டுள்ளது.

மரங்கள் சாலைகளில் விழுந்ததால் பல இடங்களில் போக்குவரத்தும் பாதிக்கப்பட்டுள்ளது. மாமல்லபுரத்தில் கடலோரத்தில் வசித்து வந்த 5 ஆயிரத்திற்கும் மேற்பட்ட மக்கள் பாதுகாப்பான இடங்களுக்கு வெளியேற்றப்பட்டுள்ளனர். கடலூர் மாவட்டத்தில் நீலம் புயலால் பெரிய அளவில் பாதிப்புகள் ஏற்படவில்லை என தகவல்கள் தெரிவிக்கின்றன.

புயல் காரணமாக மீனவர்கள் கடலுக்கு செல்லவில்லை. புயல் மற்றும் மழை பாதிப்புகளிலிருந்து மக்களை உடனடியாக மீட்க அந்தந்த மாவட்ட நிர்வாகங்கள் தயார் நிலையில் உள்ளன. போக்குவரத்தை சரி செய்வது, வீழ்ந்துள்ள மின்கம்பங்களை அகற்றி மின்சாரத்தை சீராக வழங்குவது உள்ளிட்ட பணிகளை மேற்கொள்ள அனைத்து அரசுத்துறை அதிகாரிகள் கொண்ட குழு அமைக்கப்பட்டுள்ளது. இதனிடையே, புயலால் ஆந்திராவில் கனமழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது.

பலத்த காற்றால் போக்குவரத்து பாதிப்பு

நீலம் புயல் கரையைக் கடந்து கொண்டிருப்பதன் எதிரொலியாக சென்னை கிண்டியில் பல இடங்களில் மரங்கள் முறிந்து விழுந்தன. இதன் விளைவாக போக்குவரத்து பாதிக்கப்பட்டது. சாலைகளில் விழுந்த மரங்களை மக்களே அப்புறப்படுத்தும் முயற்சியில் ஈடுபட்டனர்.

மழையோடு சேர்ந்து வேகமான காற்று வீசியதால் பல மரங்கள் வீட்டுக் கூரைகளின் மேல் விழுந்தன. இதில் பல வீடுகள் பலத்த சேதமடைந்தன. இந்த நிலையில், பாதுகாப்பு கருதி அலுவலகங்களில் பணிபுரியும் ஊழியர்கள் மதியம் இரண்டு மணிக்கே வீடுகளுக்குக் கிளம்பிவிட்டனர். இதனால் ரயில், பேருந்து, ஷேர் ஆட்டோ உள்ளிட்ட வாகனங்களில் மக்கள் கூட்டம் கூட்டமாக பயணித்தனர்.

போக்குவரத்து நெரிசல் காரணமாக பேருந்து கிடைக்காமல் மக்கள் காத்துக் கிடக்கின்றனர். இது மட்டுமின்றி, மழை காரணமாக செயிண்ட் தாமஸ் ரயில் நிலையத்தில் ரயில் போக்குவரத்து சிறிது நேரம் ஸ்தம்பித்தது.
[vuukle-powerbar-top]

Recent Post