Latest News

தங்களின் பிராந்திய செய்திகளை அனுப்பி வையுங்கள் உலகறிய செய்கிறோம்
newsalai.com@gmail.com

திருவரங்கம் 'யாத்ரி நிவாஸ்':  சமஸ்கிருத பெயரை மாற்றுமாறு கோரிக்கை - தமிழர் பண்பாட்டு நடுவம்!

திருவரங்கத்தில் தமிழக அரசு கட்டியுள்ள பயணிகள் விடுதிக்கு சமஸ்கிருத மொழியில் யாத்ரி நிவாஸ் என்று பெயர் சூட்டப்பட்டுள்ளது வருத்தமளிக்கிறது. சமஸ்கிருத மொழியை வாழ வைக்கவும் ஊக்குவிக்கவும் நடுவண் அரசு பல கோடிகளை செலவு செய்து வருகிறது. அதில் ஒரு பங்கு கூட தமிழை வளர்க்க இந்திய அரசு நிதி ஒதுக்குவதில்லை. மேலும் சமஸ்கிருத வாரம் என்று அனைத்து பள்ளிகளிலும் கொண்டாட ஆணை பிறப்பித்து சமஸ்கிருத மொழியை பல வகையிலும் திணித்து வருகிறது இந்திய அரசு. நிலைமை இப்படி இருக்க தமிழை ஆட்சி மொழியாகக் கொண்ட தமிழக அரசு ஏன் சமஸ்கிருத மொழிக்கு தமிழகத்தில் இடமளித்து அதை மக்களிடம் பரப்ப வேண்டும் என்ற கேள்வி எழுகிறது. தமிழக அரசின் செலவில் கட்டப்பட்ட பயணிகள் தங்கும் விடுதிக்கு தமிழ் மொழியேலேயே பெயர் வைக்கலாமே. அதற்கு  ஏன் இந்தி / சமஸ்கிருத மொழியில் பெயர் சூட்ட வேண்டும் என்று தமிழ் ஆர்வலர்கள் கேள்வி எழுப்புகின்றனர்.

அழகிய தமிழ் இருக்க புரியாத ஒரு மொழியில் பெயர் வைக்க வேண்டிய அவசியம் என்ன ? வெளிமாநில மக்கள் திருவரங்கம் வந்தாலும் தமிழ் மொழியில் பெயர் இருப்பதை பார்த்தால் தான் அவர்கள் தமிழ் மொழியின் சிறப்பை பற்றியும், தமிழர்களின் மொழி பண்பாடு பற்றியும் அறிவார்கள். உலகில் உள்ள பல நாடுகளும் தங்கள் அடையாளத்தை உலக மக்களுக்கு அவர்கள் சொந்த மொழியில் தான் பறைசாற்ற விரும்புகின்றன.
வட இந்தியாவிலும் அவர்கள் மொழியில் 'யாத்ரி நிவாஸ்' என்றே பயணிகள் தங்கும் விடுதியை அழைக்கிறார்கள். அதே போல நாமும் நம் மொழியில் 'பயணிகள் தங்கும் இல்லம்' என்று அழைக்க வேண்டாமா ?

அதனால் தமிழர் அடையாளத்தை வெளி மாநில மக்களுக்கு எடுத்துக் கூறவும், தமிழ் மொழியின் உரிமையை நிலைநாட்டவும் திருவரங்கம் பயணிகள் தங்கும் விடுதி தமிழ் மொழியிலேயே வழங்கப்படுதல் வேண்டும். யாத்ரி நிவாஸ் என்ற சமஸ்கிருத பெயரை உடனே தமிழக அரசு தமிழில் பெயர் மாற்றம் செய்யுமாறு தமிழர்கள் சார்பில் தமிழர் பண்பாட்டு நடுவம் கோரிக்கை வைக்கிறது.  

நன்றி
தமிழர் பண்பாட்டு நடுவம்

[vuukle-powerbar-top]

Recent Post